Pesurujaya PAS Sarawak Jofri Jaraiee madah agih belanja 2020 lebih ngemerat enggau ke guna ngagai sekeda ejensi aja dibanding ke guna ungkup rayat empu.
“Enti amat perintah Pakatan Harapan (PH) nadai belanja ke chukup dikena nangkup ke guna rayat, sida patut numpu ngagai sektor ke ulih meri pemaik ngagai menua nengah ngangkatka sektor ngeluarka utai tanam, orang berikan enggau asil bukai ari pengawa betanam ke bedau diserungkai di menua tu,” ku iya ba siti penerang kemari.
Ba bajet 2020, perintah besai ku iya deka numpuka ba pekara ngangkatmanah sekula repuk nengah agih belanja sepenyampau RM783 juta kelebih agi di Sabah enggau Sarawak.
“Ari baruh Atur Pemansang Malaysia Lumpar ke-11 (RMK-11), perintah Barisan Nasional (BN) ngemendarka RM2.7 bilion dikena ngangkatmanah sekula repuk ke alai Sarawak nerima RM1 bilion ari nya. Kini bajet ke sebedau tu, agi bisi ke enda tauka dikena ba tuju ke bukai? ku iya.
Berebak enggau nya, Chairman PH Sarawak, Chong Chieng Jen madah perintah Sarawak enda ngemeratka ngagai pekara sekula repuk.
Perintah PH ku iya bebendar deka besipingka isu bekaul agih belanja ke udah dikemendarka perintah sebedau tu enggau mayuh jaku dalih ba guna politik sida.
“Isu bekaul sekula repuk nya pekara ti mungkur ke guna rayat, nya kebuah perintah PH patut beberatka pekara ke guna rayat dibanding enggau guna parti politik,” ku iya nyemetak.
Ukai semina sekula repuk, agih belanja ungkup pengawa betanam betupi enggau berikan mega udah dikurang lalu tentu nya deka meri tating ke berat ngagai orang bumai ti diau di menua pesisir sereta orang berikan ke seranta.
“Baka ke udah dalam bajet 2020, agih belanja pengawa betanam betupi diputung ari RM194.1 juta ngagai RM180 juta lalu belanja ungkup orang berikan dikutrang ari RM178.5 juta ngagai RM 177 juta.
Pekara ti ngasaka ati iya nya orang ari menua luar ulih meli tanah kurang ari RM600,000 dibanding RM1 juta sebedau tu ti mandangka perintah PH enda beratka guna rayat ti deka bisi rumah kediri,” ku iya.
Sumber: https://www.utusanborneo.com.my/2019/10/16/bajet-2020-enda-ngipakka-guna-rayat-sarawak-jofri
No comments
Post a Comment